von Diedrich Tisse, äwasat von Heinrich Ditj

Dee Neu Samara Kolonie lach meastendeels velenjdem Tock. Aule Darpa befunge sich aum Tock oda aun eenem Biefluss: Ischalka, Beresowij, Kaltan, Kuterlja, Beresowaja. Büta Kamenetz lage aule Darpa siedlich vom Tock. Tock es een Biefluss vone Samara, dee dan uck enne Wolga mindet. Dee Bieflusse von Samara habe aula dee Besondaheit, daut see sich velenjde dee Bojatjeade Obschij Sirt vom Oste noum Waste tratje. So es daut Ewa vom Noude meistens steil aunstiend, wearend daut Ewa aum Siede allmealich aunsticht. Aum foljenden Schema-Dweaschnet vom Tockdoul enne Jeajend von Dolinstje es daut tou seene:


Oppe unjaschte Terrasse jeftet em Farjoh meist emma Äwaschwaminj. Dee Loag vom Flussbad kaun sich endre, wiels dee Tock sien Flusswajch watjselt. Dee bouwaschte Terrasse licht hejcha in daut farjohsch Wouta tjemt jeweenlich bit doa nich. Hia worde aule Darpa opjebüht dee velenjdem Tock lidje. Enne verjeschichtlije Tiet kaum dee Äwaschwaminj womeajlich bit hia, wiels daut don veal mea Wouta gauf. Daut Laund es hia uck fruchtboara aus wieda noum Siede. Oppe unjaschte Terrasse, uck Plauwinj jenant, jeit nich tou bühe in dee jeit blos aus Wiese tou brucke, op dee veal Bloome wosse, t.B. jeale Meitulpe, Lilie in Veilchen, ouba uck Beare so aus Brom- Johannes- in Ädbeare. See word don doweajen vone Aunsiedla uck nich jekoft. Nou dee bouwaschte Terrasse sticht daut Flachlaund enn eene Lenjd von so bie 12 km wada aun. Dee Tock licht so bie 90 m houch, wearend dee Woutadeelinj, aulso dee Jrenz vone Woutatjreise, tweschen deam Tock in Malij Uran so bie 200 m houch es.


Daut allmealich aunstiende Flachlaund woat von dee Bieflusse eare majchmoul sea steile Schluchte derchschneade. Bie dee Woutadeelinj stijcht see wada steil aun, ouba dee Jrenz von dee Aunsiedla ea jekoftet Laund lach dolla noum Noude. Doa met es daut Laund, op wond dee Neu Samara Aunsiedlinj jejrindet word, eenjamoute jlitj in goot fe Ackabüh jeäjend, em Jeajensautz toum Noudeewa vom Tock, wo de Bestjire leawe.
 
Ver deam aus de Menniste hia hea kaume jeef daut blos eene Stap oune Beem. Äscht dee habe hia Beem jeplaunt (wouto see äwajens uck vepflichtet weare, jieda Aunsiedla sull op 0,5 Desj. von siene Hofstead Beem aunplaunte, tjitj hia). Vondoag send dee Gauße in dee Jrenze tweschne Goades met Beem besat: Pappel, Aschebeem, Wiede, Fleda, Reestabeem, Akazine in Samorodinahatje (Johannesbeeresträuche). Tweschen eenje Darpa gauf daut breede Hatje. Daut nü aul veloutne Darp Kamenetz kaun maun nü noch emma aun dee wild vewossne Beem in Bescha ertjane. Jieda Aunsiedla haud een Veagoade enn deam et uck Ouftbeem gauf.

Dee hejchsta Boj bie dee Bojagrupp Wanjakina Schischka es 300 m houch in befinjt sich 12 km siedlich von Bogomasov. Aum Foot von disem Boaj entsprinje Otnaschka in Enkla, dee tweschen Bogomasow in Dolinstje noum Tock scheale.

Daut Tjlima es ütjeteatjent kontinental: dee Winta es langk, kolt met veal Schnee, wearend de Somma heet in dreajch es. Dee Winta fangt aul Meddel Oktoba mettem äschte Schnee aun. Daut diet goanich lang dan jeftet deam emma mea. Bit enne 50-ja Johre gaufet hüshouge Schneediene. Wiels dee Aunsiedlinj enn eene woldlose Stap licht, kaun dee Schneestiem, op Rusch "Buran" jenant, sich so rajcht üttobe. Daut tjriesle rieseje Schneemauße enne Loft, dee eenem Ouge in Neas tobacke welle. Äscht em Aprel fangt dee Farjoh aun in dee Schnee aun tou daue. Daut Schneewouta äwafellt aule Grouwes in Ritsche in jeit bit ne Weatj nich wajch. 80 % von deam jesaumte Wouta em Joh schealt em Tock enn dise Tiet auf. Dee äwaje Tiet em Joh es weinich Wouta. Dee Somma es meistens heet in dreajch met seldna ouba tjraftja Reajen. Wiels dee Gauße mearendeels nich asfalteat send, jeft et noum Reajen groote Woutapudels. Dee Niedaschleaj send met 300-400 mm pro Joh em Vejlitj met Dietschlaund met äwa 800 mm weinja, do von fellt daut jratste Deel em Winta aus Schnee.

Enn deam Tietrüm 09.03.2000-08.03.2004 wea, nou dee Aungouw vone meteorologische Station enn Busuluk, dee mea aus 80 km von Pleschanow aufsteit, dee hejchste Temperatua 34 Groud in dee leajchste -35 Groud. Daut gauf 445 mm Niedaschlach pro Joh.